Rijssense Psalmen

1.
O HEARE, luster noar minn stemme,
minn smeekn as ik miej vaste klemme
an Oewe trouw, geewt miej beskeed,
dà-k Oew gerechteghaejd venemme,
ik, Oewen knech den vuur Oe steet.

2.
O HEARE, kom toch neet Oew knechte
inteeng met Oewe haejlge rechen.
Gin meanske kan vuur Oe bestoan.
De viejaand wil niks aans as vechen
en zit vedan miej achternoa;

3.
hee dut miej in et duuster zwoarven
en gref min graf umm doar te stoarven
en houwt tamee miej teeng de groond.
Heel min gemood lig kàts an skoarven,
ik kan neet mear, min hatte blood.

4.
Ik goa wierumme in gedachten
wat Iej in oonze vuurgeslachten
edoan hebt, an oons hebt egeewn.
Ik deank an wat oonz’ oongn toew zaggen,
an alns wat van Oe steet eskreewn.

5.
k Loat Oe neet lùs, loat Oewe oarme
in disse nood miej toch beskoarmen.
K Zin meu, minn zeele steet in braand
en wocht vedan op Oew oontfoarmen
vanoet een doods en dùsteg laand.

6.
Geewt toch beskeed, doot toch een woonder
en maak toch an, ik kan neet zoonder.
Veboarg Oewzelf toch neet vuur miej,
aans goa ik an de dood ten oonder.
Kom miej inteeng en maak miej vriej.

7.
Loat met Oew goodhaejd in gedachten
de dag miej toch temeute lachen.
Biej Oe alleeneg veen ik vrea,
op weage woer, biej dag en nachen
min hatte kort biej Oe mag wean.

8.
Maak minne viejaann toch te skaande,
bewoar miej vuur ùer vaalse taane.
Biej Oe te wean dut miej zoo good.
Lear miej te waandeln an Oew’ haane.
Iej zeent minn God en geewt miej mood.

9.
Loat Oewen Gees de weg miej wiezen;
Hee dut miej lieke weage kiezen.
Umm Oewen Naam, doo miej toch leawn.
Rechveardeg God, Oe wil ik priezen.
Red miej, ik veule miej begreawn.

10.
Breng minne viejaann toch an n eane,
dee leu dee aajt vedan en gearne
miej op de hoed zitt. Doo miej rech,
dan is min zeele wier tevreane,
o HEARE, want ik zin Oewn knech.

Volgt nog