Rijssense Psalmen

1.
k Legg’ minn zeele in Oew haane,
biej Oe skuul ik in de nood.
Maak miej, HEARE, neet tot skaande,
want minn viejaand maakt zik groot.
Iej komt as nen Helper tot
alln dee vuereg op oe wochen,
mer beskaamt de vaalse spot
van de leu dee Oe noojt zochen.

2.
Wil miej Oewe weage wiezen,
lear miej woer ik hen mut goan
um de juuste weg te kiezen.
Loat minn vuete vaste stoan.
Iej alleeneg maakt miej vriej,
geewt miej alle daage krachen.
Deank in leefde toch an miej,
eeweg good zeent Oew’ gedachen.

3.
Alle zuenden dee k zoo lange
toew ik joonk was hebb’ edoan;
nemt ze vot, dà-k neet mear bange
en wier rech vuur Oe mag stoan.
Kiek miej toch wier vreendlek an
– Iej zeent ealke in Oew haandeln –
dà-k moet Oe wier vearder kan
en wier rech vuuroet mag waandeln.

4.
An wee klean wort vuur de HEARE
dut Hee in Zinn leefde good;
oarme leu dee zoonder eare
leawn munn, gef Hee nieje mood.
Wat de HEARE dut is rech,
Hee zal Zinne trouw bewiezen.
Alln dee waandelt op Zinn weg
zùet vedan Zinn goodhaejd priezen.

5.
Um Oew Naam zoo hoog’ epreezen,
wil minn groote skoold vegeewn.
Biej nen keal den Oe wil vreezen
steet Oewn weg in t hatt’ eskreewn.
Hee mag wonn in stille vrea
woer hee rùssen mag van t zwoarven;
zinne wichter zùet ne stea
oonder Oewen heemel oarven.

6.
Alln dee dissen HEARE vreezen
is Hee kunneg en kort biej,
hef Hee Zinne trouw beweezen.
k Roope en Hee maakt miej vriej.
Kiek miej toch geduureg an
as ik in min mùejte gùlle
en zoowat neet vearder kan.
Min vedreet wort miej te vùlle.

7.
Weas geneareg, k zinn’ zoo bange,
bange joa tot op et bot.
Alle zuenden dee k zoo lange
al edoan hebb’, nemt ze vot.
Kiek minn viejaann, neet te telln
skaejt neet oet met vaals te lachen,
maakt zik op um miej te kwelln,
met de dood in ùer’ gedachen.

8.
Miln in al et bange zuchen
red de HEARE van de dood.
Tot Wee aanders zol ik vluchen,
Iej alleeneg helpt in nood.
Maak miej ealke en oprech,
kort biej Oe wort t hatte stille.
God, wies Israël de weg,
geewt Oew Volk wier nieje wille.

Volgt nog