Rijssense Psalmen

1.
Alle daage, alle nachen
skreew ik tot Oe al minn klachen.
k Roope met minn stemme tot
Hee miej heurt, minn Hear’ en God.
Truest miej neet, ik zin zoo bange,
want ik zeuk’ Um al zoo lange.
Deankn an God dut miej zoo zear,
k kwiene vot, ik kan neet mear.

2.
k Woche op Oew angezichte,
k zin ebrùkn, minn moond blif dichte.
k Zin vedan an t prakkezeern
oawer vrooger, eewn eleen.
Tóew ha-k an nen psalm zonn wille;
nón wort t hatte neet mear stille.
Hef de Heare oons bestoan
dan vuur eeweg vot edoan?

3.
Is Zinn goodhaejd neet onmeujneg,
is Zinn helleghaejd zóo gleujndeg,
hef Hee oons vuur aajt vestot,
mu-w non vearder zoonder God?
t Stàk miej, ik kan Um neet missen,
k kan miej neet in Um vegissen.
k Magge bleend wean van vedreet;
Zinne haan’ veraandert neet

4.
k Nemm’ Oew’ woondern in gedachen
dee viej, HEARE, vrooger zaggen.
Joa, k wil zoonder oonderbràkn
doarvan alle daage spràkn.
God, Oewn weg is hoog’ en haejleg
en zoo vear; toch zinn ik vaejleg.
God dut woondern, Hee is groot,
Hee maakt Zik bekeand in nood!

5.
Iej dreungn in Oew groot oontfoarmen
Israël op stoarke oarme.
t Waater zag Oe. Op de groond
broezen t waater weeld in t roond,
t skruk en fiddern. Oet de wolken
stroomn et waater; t skuumn en kolken.
Oewe pieln, dan doar, dan hier,
skeutn as vlamm hen ende wier.

6.
Miln in al et skuddn en doondern
zag de weald Oew’ groote woondern.
Rech duur t lùchen, loch en lech
maakn iej in de zee Oewn weg.
Noojt kan n meanske, non of laater
zonn nen weg maakn duur et waater.
As nen Skeeper, duur de nach,
he-j Oew volk op t druege ‘brach.

Volgt nog