Rijssense Psalmen

1.

Zoo hooge n heemel geet
en healder boawn miej steet;
joa zoo onaejndeg vear
en wied de loch zik spraejt
is God in hearlekhaejd
onmeujneg vùlle mear.
De stemme van de dag
geet oawer in de nach
um oons op God te wiezen.
Totdàt et stille wort,
want wùere skeet tekort
um dissen God te priezen.

2.
Ùer boskop: God is good
heurt heel de weald in t roond
tot woer de zunne steet.
God hef vuur dissen heald
ne teante op esteald
tot hee in t roone geet.
Hee lùp zinn kaamer oet
op zeuk noar zinne broed.
Zee um doar heemelhooge
langs loch en wolken goan;
wee kan zinn glood duurstoan,
zik boargen vuur zinn ooge?

3.
De wet van God is good
vuur t hatte en t gemood.
Iej kùent dr vast’ op bouwn.
Wee aajt in t duuster wonn
en alns doar missen monn
leart non op God vetrouwn.
De wet van God is rech,
skient as een healder lech
en gef miej vùlle wille.
Et Woord van God is woar,
zoo zuuwer en zoo kloar
en maakt et hatte stille.

4.
Wort klean vuur dissen God
en leawt noar Zin gebod,
valt Um vedan te voot
en luster naor Zinn road,
goat vot biej al et kwoad,
dan geet et eeweg good.
Et allerzuuwerst goold
lùt toch et hatte koold,
al liek iej nog zoo rieke.
Van honneg kù-j neet leawn;
et zuete doert mer eawn.
Niks is an God gelieke.

5.
Velùs miej van et kwoad,
dee dwoaze gruetse proat;
maak toch min hatte vriej.
En loat et toch neet too
dà-k nog mear zuende doo;
bewoar miej toch opniej.
De zuende gef gin vrea,
k wil gearne ealke wean,
en t hatte op Oe richen.
Minn vaste groond is God,
k wil zingn van Oew gebod
vedan in minn gedichen.

Volgt nog